Анэ псори зэхуэдэкъым, анэ псори анэкъым

ЗэзыдзэкIар Щомахуэ Залинэщ 

Мин бжыгъэ мэхъу  зи узыншагъэм сэкъат иIэ сабийхэр. Зэгуэр фегупсысауэ пIэрэ фэ апхуэдэхэм я анэхэр къызэрыхахым?

Си нэгу къыщIызогъыхьэ, дэтхэнэ зыри фIыуэ дызыцIыху Алыхьыр мыпIащIэу, гупсэхуу, куууэ псоми къызэрыдэплъыр. ФIыуэ егупсыса нэужь, абы и блэгущIэт мелыIычхэм унафэ яхуещI,  псом нэхъыщхьэ ГъащIэ ТхылъкIэ зэджэм  иратхэнур яжреIэ.

Зыкъомым я гугъу ищIауэ, Алыхьым  зы цIэ гуэр къреIуэ, погуфIыкIри: «Абы сабий ныкъуэдыкъуэ ет»- жи.

МэлыIычым фIэгъэщIэгъуэн хъуауэ щIоупщIэ: «Сыт  ар лейуэ къыщIыхэпхар? Ар зэрынэсыпыфIэ умылъагъуура?».

«Солъагъу, аращ щIестри! Насыпымрэ  гуфIэгъуэмрэ зымыцIыхум сыхуиту пIэрэт  сэ   сабий ныкъуэдыкъуэ естыну? Ар гущIэгъуншагъэм я гущIэгъуншагъэжт…

«ИIэу пIэрэ а бзылъхугъэм зыхуеину шыIэныгъэр?» - щIоупщIэ мелыIычыр.

«Егъэлеяуэ шыIэныгъэшхуэ хэлъыну сыхуейкъым сэ абы, арыншамэ, и щхьэ фIэгуэныхь, фэтхьэмыщкIэ  хъужурэ, абы текIуэдэжынущ. Ар япэ щIыкIэ щтэнущ, итIанэ игу къызэбгъэнущ,  иужькIэ и бгыр щIикъузэнурэ  пэлъэщынущ а къалэн мытыншым».

«Уи  ней къысщумыхуэ, ауэ абы Алыхьыр и фIэщ мыхъуу фэ тетщ!»

Алыхьыр погуфIыкIри: «Умыгузавэ, дэ зэдгъэзэхуэжынщ ар! Хьэуэ, мы цIыхубзым фIы дыдэу    хузехьэнущ  а къалэныр! Абы и щхьэр зыкIэ фIыуэ елъагъужри…»

МелыIычым зыри къыгурымыIуэу щIоупщIэ: «И щхьэр фIыуэ елъагъуж  жыпIа? Ар фIым щыщ – тIэ?».

Алыхьым и щхьэр арэзыуэ ещIри. «Ар  зэикI къыбгъэдэмыкIыу и сабийм  бгъэдэсмэ,  и гуауэм езыри ихьыжынущ.  Аращ, сэ  мы цIыхубзымкIэ сыарэзыщ. Езым иджыри къыгурымыIуэми, абы узэхъуэпсэн  бгъэдэлъынущ. Ар сыт щыгъуи и сабийм тегужьеик1ауэ щытынущ, абы  жиIа псалъэ къыфIэмыIуэхуу зэикI къэхъунукъым,  ича лъэбакъуэ къэс  щыгуфIыкIыу  псэунущ.  Абы  «Мамэ»-кIэ къыщеджа дакъикъэм гъуэбжэгъуэщ насып къыIэрыхьауэ, насыпыфIэм я насыпыфIэжу зыкъилъытэжынущ. Сабий узыншэ зиIэм ар къыгурыIуэнукъым…

Сэ слъагъум щыщ  куэдым, дунейм къыщекIуэкI фэрыщIагъэм,  напитIагъым, нэпсеягъэм нэгъуэщI куэдми я щыхьэт сщIынущ ар, итIанэ а псоми ящхьэщысIэтыкIынурэ  лъагэу згъэтIысынущ. Абы зэикI къищIэнукъым закъуэныгъэр зищIысыр, и гъащIэм щыщу зы дакъикъэ  къэмынэу сэ сыщIыгъунущ абы,  сэ къызбгъэдэту, уафэм щыпсэухэм хуэдэу згъэпсэунущ,  си лэжьыгъэр  апхуэдизу фIыщэу щIылъэм зэрыщигъэзащIэм папщIэ!»

 «Ар къэзыхъумэну дзыхь  зыхуэпщIыну мелыIычыр хэт?»- мелыIычым жиIэнур имыух щIыкIэ зы къабзий закъуэ жьым зэрихьэу къонэри, езыр мэбзэхыж.  

Алыхьыр погуфIыкI: «Абы гъуджэ къудейри хурикъунущ»…