УЭЛШ ДЖОН

Хъыдан    гуащэ

Мы тхыгъэр илъэс  куэд  лъандэрэ    Колумбие   тхакIуэ, Маркес  Габриэл Гарсиа  ейуэ  ялъытэ.  Ауэ,   къызэрыщIэкIымкIэ,  ар  тхакIуэшхуэм  и  Iэдакъэ  къыщIэкIакъым, уеблэмэ  тхыгъэр    и  цIэм  зэрыпатхар  щызэхихыжам,  и жагъуэ  хъуат.  «А  тхыгъэ  мыхьэнэншэр  щхьэ  сэ  стхауэ  я  фIэщ  хъун  хуея?» -   жиIа  хуэдэуи   кърахьэкI.   «Хъыдан  гуащэ»  зи  фIэщыгъэ  прозэу  тха   усэшхуэр  зэхэзылъхьар  театрым  гуащэхэр  щызыгъэджэгу,  Перу  къэралым  щыщ  артист   Уэлш  Джону  къыщIэкIащ.  Тхыгъэр  литературэм  и  Iыхьэ   хъуакIэщ,  къыщIыхэтхар  Маркес   зэритхаратэкъым,    дигу  ирихьати  аращ, ар адыгэбзэкIэ дунейм тетыну хуэфащэрэ хуэмыфащэрэ, еджэм зэхигъэкIынщ.

Дунейм     ехыжым    и     тхыгъэ

Сэ  хъыдан   гуащэ  къудейуэ  сызэрыщытыр Тхьэм  зы  дакъикъэкIэ  зыщигъэгъупщэрэ   гъащIэ  Iыхьэ  цIыкIу  къызитыжатэмэ,  сызэгупсыс псори  жысIэну   къыщIэкIынтэкъым,  ауэ   жысIэу   хъуам   сегупсысынт.

ТекIуэдам   сеплъурэтэкъым  зыгуэрым  уасэ  зэрыхуэзгъэувынур, и мыхьэнэм     елъытауэт.

Нэхъ  мащIэрэ  сыжеинт, нэхъыбэрэ  фIым сехъуэпсэнт,  ди нэхэр зэтетIпIэху    нэхуу   секунд   хыщI  зэрытIэщIэкIыр   зыщызмыгъэгъупщэу. 

Адрейхэр  щытыху,  сэ  сыкIуэнт, нэгъуэщIхэр  жейми  сыжеинтэкъым. ЖаIэхэр  зэхэсхынт, итIанэ  сытым  хуэдэу  зыстIыжынут  сэ  шоколад  шэIумылкIэ. 

Алыхьым иджыри зы дакъикъэ гъащIэм къысхупищамэ, нэхъ къызэрыкIуэу зысхуэпэнт, дыгъэм сыдэлъынт, бзий хуабэхэм си Iэпкълъэпкъым  и  мызакъуэу, си  псэри  хуит яхуэсщIауэ. Гу сиIэжамэ, ди Тхьэ, абы  гужьгъэжьу  илъыр мылым  тестхэнти  дыгъэ  къыкъуэкIыным сыпэплъэнт.   

Ван  Гог  и  гуращэу  Бенедетти  и   усэшхуэр  вагъуэхэм тестхэнт, «Серрат» уэрэдри  Мазэм  тыгъэ  хуэсщIын  пшыналъэт. Си нэпсхэр гуащэнапщIэхэм   ящIэзгъэлъэдэнт,  я   банэхэм  зэрагъэузымрэ я  гъэгъахэм я  бэуэкIэ  плъыжьымрэ  зыхэсщIэн  папщIэ…

Иджыри  гъащIэ тIэкIу  сиIэжамэ, ди Тхьэ, зы махуэ блэзгъэкIынтэкъым си гум  щызгъафIэ цIыхухэм фIыуэ зэрыслъагъур яжезмыIэу. Си псэм  пэсщI  дэтхэнэ зыми  и  фIэщ сщIынт фIыуэ зэрыслъагъур,  фIылъагъум   ситхьэкъуауи   сыпсэунт.

 Жьы зэрыхъуам къыхэкIыу, зыри  фIыуэ  зымылъагъужыфу къызыщыхъухэм   къагурызгъэIуэнт    цIыхур    жьы     щIэхъур   зыри   фIыуэ  зэримылъагъум   къызэрыхэкIыр!  Сабийм   дамэ   естынт, ауэ езыр-езыру лъэтэкIэ  зригъэсэжыну   хуит   сщIынт.  Зи ныбжь  хэкIуэта  гуащэхэмрэ щауэхэмрэ   я   фIэщ    сщIынт    лIэныгъэр    жьыгъэм     къызэрыхэмыкIыр, ар   зи   Iэужьыр    гу    зызымыIэтыжрауэ    зэрыщытыр.   

Сыт хуэдизым  зезгъэса, цIыхухэ, сэ, фэ  сынывэплъурэ, икIи къызгурыIуащ  дэтхэнэ  зыри   бгыщхьэм  тесыну  хуейми, насып къытIэрыхьэнкIи   хъунур   ди  бгы дэкIыкIэм  зэрелъытар. 

Сэ  къызгурыIуащ  сабий  цIынэ  къалъхугъащIэм  и  адэм  и Iэпхъуамбэ    иубыдар    игъащIэкIи   зэриIыгъынур. 

КъызгурыIуащ  зы   цIыхур    адрейм   хуеплъыхыну   хуит   зыщIыр   ар къигъэтэджыжын  хуей  къудеймэщ,  нэгъуэщIкъым.

Иджыри Iэджэм зезгъэсэфынут сэ  сынывэплъурэ, цIыхухэ, ауэ къысхуэщхьэпэжыну  хъункъым а  псор, сыту жыпIэмэ,  мы пхъуантэм сыдалъхьэжа  нэужь,  сэ,  дауи, си  псэр хэтыжынукъым.

ЗыхэпщIэр   зэи   умыбзыщI,  узэгупсысыр   щIэ.

Нобэ фIэкIа  зэи  ужейуэ  узмылъагъужыну сщIатэмэ, IэплIэ быдэ пхуэсщIынти Тхьэм  селъэIунт  мелыIыч хъумакIуэу сыпщхьэщигъэувэну. Нобэ фIэкIа  бжэ   зэхуакум  удэкIыу узмылъагъужыну  сщIатэмэ, сыноджэнт,  зыносшэкIынти,  аргуэру   сыноджэжынт   нэхъыбэж   къыпIэщIэзнэн  папщIэ.  Нобэ   иужь   дыдэу   уи    макъыр   зэхэсхыжу    сщIамэ, жыпIэ  псори  езгъэтхынт,  иджыри,  иджыри  къытезгъэзэжурэ  седэIуэжын хуэдэу. Иджыпсту  дызэрыт  дакъикъэр  дэкIмэ, афIэкIа зэи узмылъагъужыну  сщIамэ,  бжесIэнт   фIыуэ  ущызмылъагъу зэман   къызэрысхуимыхуар,   сигукIэ  «Ар   армырами  ещIэ,   щхьэкъэб»  жызмыIэу.   

 Сыт щыгъуи  пщэдей щыIэщ, гъащIэм  Iэмал къыдет псори зэдгъэзэхуэжыну,  ауэ сыщыуарэ  нобэ  фIэкIа  зыри  къэмынэжамэ, сыхуейт бжесIэну си  гум  куууэ  узэрилъри  зэи  узэрысщымыгъупщэнури. Жьыри щIэри   бэлэрыгъ   хъунукъым  пщэдейрей  махуэр  къэсыным щыгугъыу.

Нобэ  фIэкIа  фIыуэ  плъагъухэр  умылъагъужынкIи мэхъу. Аращи, зыми  упэмыплъэ, щIэ  ар   нобэ,  пщэдейр   зэи  къэмысмэ,  зы    гуфIэкIэ,  зы    IэплIэ, зы   жьы   къызэдэшэгъуэ   уигу   щыпымыкIа   махуэм  улъэмыIэсыжу,   иужьрей   хъуапсапIэм  утеIэбэну  узэрыхущIэмыхьам   ухущIегъуэжу    упсэунущ.

Уи  Iыхьлыхэм  защIэгъакъуэ,  иIущащэ  я  тхьэкIумэхэм   ахэр  уимыIэу узэрымыпсэуфынур,  фIыуэ  лъагъу ахэр,  ящысхь, къэгъуэт зэман «сыту  сыхущIегъэжа»,  «кхъыIэ,  къысхуэгъэгъу»,  «сытыт уэ нэмыщIамэ, сщIэнур» яжепIэну,  фIылъагъу  къызэрыкI   псалъэу  пщIэхэм   ящыщу  яжумыIа   къыумыгъанэ.

Зыми  игу  укъинэнукъым  уи  гупсысэхэм  я  фIыгъэкIэ. Алыхьым елъэIу  зыхэпщIэр  къэпIуэтэфын хуэдэу,  Iущыгъэрэ  къарурэ  къуитыну. Егъэлъагъу уи  ныбжьэгъухэм  ахэр уи дежкIэ зэрылъапIэр. Иджыпсту  ар жумыIэмэ, пщэдейрей   махуэр  нобэрейм  ещхьыркъабзэу   екIуэкIынущ. Зэи ар  умыщIэмэ,  зыми  мыхьэнэ   иIэххэкъым.  ТеIэбэ    уи   гуращэхэм. А дакъикъэр къэсащ!