Пшъэшъэ мыгъасэр зэрагъэсагъэр

АдыгабзэкIэ  зэзыдзэкIыгъэр  Къуекъо  Налбый

Пшъэшъэ  мыгъасэр  зэрагъэсагъэр

Хэтхэр:

Баптиста – Падуе  щыпсэурэ  лIэкъолъэш  бай.

Винченцио – Пиза   щыщ   лIэкIолъэш, лIыжъы.

Люченцио – Винченцио ыкъу, Бьянкэ шIу елъэгъу.

Петруччо – Веронэ щыщ лIэкъолъэш, Катарина ипсэлъыхъу.

Гремио -  Бьянкэ ипсэлъыхъох

Гортензио - Бьянкэ ипсэлъыхъох

Транио – Люченцио иунэIутых.

Бьонделло – Люченцио иунэIутых.

Грумио, Кертис, Натаниэль – Петруччо иунэIутых.

Никлас

Филипп.

Питер.

Катарина, Бьянка – Баптиста ыпхъух.

Пхъужъыр.

ДакIор – галантерейщикыр, Баптистэрэ Петруччорэ яунэIутхэр.

 

 

АПЭРЭ ЕДЗЫГЪУ

Апэрэ къэшIыгъу

Падуя. Площадыр. Къехьэх Люченцио, Транио.

ЛЮЧЕНЦИО

Сэ гугъэ лъапIэу сиIэр къыздэхъугъ

Слъэгъунэу Падуя, шIэныгъэм и къежьапIэ,

Италиеу кIочIэшхом исад шIагъоу

Ломбардиеми, марышъ, сыкъэсыгъ.

КъызэрысфэшIум сятэ ихьатыркIэ.

КъысфэгумэкIи, гъусэ укъысфишIыгъ.

Цыхьэ зыфэсшIэу, сиунэIутэу Транио,

О уишъыпкъагъи сIэпыIэгъущт.

Тыщыпсэущт мыщ титIо, сыхьатмафэу

Наукэхэр зэдгъашIэу зытшэтэщт.

Сыкъызщыхъугъэр Пиза сэ. А къалэм

ЦIыфышIоу дэсмэ ацIэкIэ, бэшIагъэу

Ищытхъу зэлъашIэ. Ахэмэ ащыщ

Винченцио – сятэ, илIакъокIэ – Бентиволио.

Дунаим тетэп сатыу ащ димышIэу.

Флоренцием сыщипIугъ сэ. Ащ игугъэ

Джы къэзгъэшъыпкъэжьынэу сипшъэрылъ.

ШIушIэныр гъусэ фэсшIыжынышъ мылъкум.

СызкIыпыхьащтыр, Транио, джащ пай

Сэ философием ылъэныкъоу

КъэзыIорэм – насыпыр уишIушIагъ.

Къызэрэдэпхынэу щыIэ закъор.

Сыд къепIолIэщт? IэкIыбы къэсшIи Пизэ,

СыкIэгуIагъэр Падуе сыкъэсыфэ –

Псыщэнджыр сыбгынэнышъ, икуупIэ

ЗычIэзгъэонышъ, псынкIэу, сигопэгъу

ЩыдэзгъэкIынэу ары гъунэм нэсфэ.

ТРАНИО

Къысфэгъэгъу, лIы шIагъоу сизиусхьан!

Сигуапэ о уишъыпкъэу теуубытагъэшъ

Философием иIэшIугъэ ууплъэкIунэу.

Ау, зиусхьан, фэсшIыщтми лъытэныгъэ

ШIушIэным уфэзыпIурэ философием,

Къин пстэури зэпытчынэу ищыкIагъэп,

Хьисапыр, метафизикэр, осIон занкIэу,

Гъэфедэх, ныбэм къемыхьэлъэкIынхэу.

IэшIугъэ зыкIэмылъым шIуагъи хэлъэп.

Угу рихьрэр ары зэбгъэшIэны фаер.

ЛЮЧЕНЦИО

Опсэу о, Транио! Сыбгъэгъозагъ боу дэгъоу.

Джы дгъотыжьыгъагъэмэ Бьонделло,

ТиIофхэр Падуя тэ дэдгъотэщтхэр,

Ебгъэблэгъэн плъэкIынэу тыубытыни.

Зэгу зэ! ТадыжькIэ хэта мы къежьагъэр?

ТРАНИО

Купышхоу къытпэгъокIхэу къышIэчIын.

(Баптиста, Катарина, Бьянка, Гремио, Гортензиор къехьэх. Люченцио, Транио IокIотых).