Сихъу СултIан

МашIокIэ тхыгъэ сатырхэр

МашIокIэ тхыгъэ сатырхэр,
Сакъэу тхьапэм регъэкIу,
Бгъэм дэмыфэрэ джэпсалъэр
Мэкъэнчъэу гу пагъэм къыпэткIу.
Мычъыеу чэщныкъо жъуагъор
УсакIом шъэфэу къылъэплъэ
МашIокIэ тхыгъэ сатырхэм
ЫгукIэ ыгъатхъэу къахэплъэ.

***

Гъатхэм къыдэкIо дэхагъэр
Тхьам къытепэсы шIушIагъэр
Гум къыхегъэщы пэблагъэр,
Тщэгъупшэ гухэкIэу тиIагъэр.
КIэнэцIы цIыфыр, мэгугъэ,
ШIохъылъэп гъогоу къыкIугъэр:
КъешIушIэ гъатхэу къихьагъэр -
Къэущы гугъэу иIагъэр!

***

Пчэдыжь къэс а зы тхьамафэм
Зэпымыоу бзыур джагъэ.
КъытемыкIэу ичъыг шъхьапэ
Зыфищагъ ащ цIыфыгу пчъагъэ.
"Бзыу орэдым тегъэчэфы,
Ащ тыдэтхъэ тыдэчэфы",-
Ары бэмэ раIолIагъэр,
СыгукIэ сштагъэп ащ къаIуагъэр.
Хэзгъотагъ орэд мэкъамэм
Тхьаусыхэни, бзыу гукъани
ЧIым къытефи сштэгъэ пкIашъэм
Хэслъэгъуагъ сыгу зыуIани.
Сацунтхъагъ къутэмэ пчъагъэм
Себгыгъ панэу къысхэуагъэм
Ау слъэгъугъэр гукIодыгъу
Щыр лIэгъитIу набгъом илъыгъ.
ДэсIэтыгъ бзыум гукIаер
КъыдэсIуагъ ащ гъыбзэ Iаер
Зэхэзыхыгъэр дгъэгушIуагъэ,
ЗыхашIагъэп тихьэдагъэ.

***

Ныдэлъф макъэр тэ тIумылъмэ,
Тым ихабзи тхэмылъыжьмэ
Тисабыйхэм сыд къафэтыр,
Ар къэзы
Iонэу хэт къытхэтыр?
ТхьамыкIахэп адыгабзэр,
МыхъопсапIэу щытэп хабзэр.
Сыд пай адэ лъыр тэ ткIэчъыра?
УпчIэ къиным джэуап къешъутба!

 ***

ЗыIаж,
Зыгъэпыт
ЧIым зыхатI
Псэу къэнагъэм лъэпсэнчъэу

Умыбг,
УмылъаIу,
Нэпс къэмыгъакIу
Щэчы хьазабыр мэкъэнчъэу.

Ущымыт
Ущымыс,
Ущымылъ
Ущытэу еж гукIаем

Умылъэгъу
УмыдаIу,
Умыпсалъ
Ерэст щыIэныгъэр мэшIуаем!

Пэуцу къин мыгъуаем гугъэнчъэу,
Щыпсэу чэщыбг шIункIым мэфэнчъэу,
Ерэф нэпс гъукIагъэр гу махэм,
Ау ущымыгъ о мэзахэм!

УпчIэ заул
Мазэр къэзылъфырэр Чэщы
Жъуагъэр зыгъэлыдырэр ШIункIы
Гур зэкIэзгъаблэрэр МашIо
Шхьэр зэзыфэкIырэр Гуапэ
Сыд пай ренэу тыхэукъора?

ПцIыр зашэрэр Къэрэбгъагъ
Шъыпкъэр зажэрэр Зэфагъ.
УпчIэ зытырэр Акъыл,
Джэуапынчъэр- Къушъхьэ мыл.
Сыда ренэу тэ тызпаплъэрэр?

ГъашIэм икIо- Джанщэрэхъ
Хэукъоныгъэр- Бэджэхъ
Къин хэфагъэр – УбэкIай
ХэкIыпэнчъэр - КIодыкIай
Сыда ренэу тызщыгугъурэр?

Дэеу пшIагъэр- Лъытэгъуай
ШIушIэ пстэури- ДэхэкIай
Гъогу пкIугъахэр – ГукъэкIыжь
КъэпIогъахэр – ПшъэдэкIыжь
Сыд пай макIэу тыгупшысэра?

 

***

Пчэдыжь къэс а зы тхьамафэм
Зэпымыоу бзыур джагъэ.
КъытемыкIэу ичъыг шъхьапэ
Зыфищагъ ащ цIыфыгу пчъагъэ.
"Бзыу орэдым тегъэчэфы,
Ащ тыдэтхъэ тыдэчэфы",-
Ары бэмэ раIолIагъэр,
СыгукIэ сштагъэп ащ къаIуагъэр.
Хэзгъотагъ орэд мэкъамэм
Тхьаусыхэни, бзыу гукъани
ЧIым къытефи сштэгъэ пкIашъэм
Хэслъэгъуагъ сыгу зыуIани.
Сацунтхъагъ къутэмэ пчъагъэм
Себгыгъ панэу къысхэуагъэм
Ау слъэгъугъэр гукIодыгъу
Щыр лIэгъитIу набгъом илъыгъ.
ДэсIэтыгъ бзыум гукIаер
КъыдэсIуагъ ащ гъыбзэ Iаер
Зэхэзыхыгъэр дгъэгушIуагъэ,
ЗыхашIагъэп тихьэдагъэ.

***

Къыхэо гум мэстапэр,
ЩэкIуасэ бгъэм гугъапIэр,
Къыщэжъо лъым гукъаор
Кежьэ нэрымылъэгъу заор.
КъыкIэзы нэм нэпсыцэр,
Нэгу ужым рэчъэ псыдзэр!
ЕткIухы макIэу гугъэр,
КъыфэкIо ыкIэм шIугъэр!

 

***

Сыгу уилъ зэпыт -
УиIуплъэ дахэу
Умакъэ шъабэу,
Уищхыпэ къаргъоу.
Сыгу уилъ зэпыт -
Убзыу шъхьэфитэу,
Ужъогъо лыдэу,
Тыгъэр пшъхьэщытэу!

Сыгу илъ а мафэр
Гъэтхэпэ мазэр,
Къэгъагъ сикIасэр
МэшIо мыкIуасэр…
Сыгу илъ а пчыхьэр
ГугъэпIэ махэр
Сыхьат мыкIыхьэр
Урам мэзахэр...

Сыгу уилъ зэпыт
Укъысфэмыеу,
Укъысэмыплъэу,
Зыкъысщыбдзыеу.
Сыгу уилъ зэпыт
Ащ усфитхъыщтэп,
Усщыгъупшэщтэп,
Ау сизэкъощтэп…